Þjónustuskilmálar

Þessir skilmálar gilda um rPOS sölukerfið og tengda þjónustu sem Retail ehf („rPOS“, „við“ eða „okkur“) veitir. Með því að stofna aðgang eða nota þjónustuna samþykkir rekstraraðili skilmálana. Sá sem kemur fram fyrir hönd rekstraraðila staðfestir að hann hafi heimild til þess.

Ef skriflegur samningur eða samþykkt tilboð kveður á um annað gilda þau ákvæði framar þessum skilmálum.

Þjónustan

rPOS er áskriftarþjónusta fyrir verslanir, veitingastaði og þjónustufyrirtæki. Áskriftin veitir aðgang að kassaforriti, stjórnkerfi, hýsingu gagna og þjónustu samkvæmt þeirri áskriftarleið sem rekstraraðili velur. Við kunnum að breyta eða uppfæra þjónustuna. Ef breyting skerðir notkun verulega tilkynnum við hana með hæfilegum fyrirvara.

Aðgangur og innskráning

• Rekstraraðili ber ábyrgð á aðgangi sínum og starfsfólks síns og á þeim aðgerðum sem fara fram í gegnum aðgangana.
• Aðgangsorð, PIN-kóða, aðgangslykla og innskráningarhlekki má ekki deila með óviðkomandi.
• Láttu okkur vita tafarlaust ef grunur er um óheimilan aðgang.

Áskrift og greiðslur

• Áskrift er mánaðarleg og án frekari bindingar nema um annað sé samið. Verð eru birt án virðisaukaskatts á rpos.is eða koma fram í tilboði.
• Viðbætur sem rukkaðar eru eftir notkun eru gerðar upp mánaðarlega.
• Reikningar eru gefnir út rafrænt. Við vanskil geta dráttarvextir og innheimtukostnaður bæst við. Við getum takmarkað aðgang við vanskil.
• Uppsögn tekur gildi við lok yfirstandandi áskriftartímabils. Tímabilið er greitt að fullu og ekki endurgreitt að hluta.

Gögn rekstraraðila

• Sölu-, vöru- og viðskiptavinagögn sem verða til í rekstri rekstraraðila tilheyra honum. rPOS vinnur gögnin til að veita þjónustuna samkvæmt persónuverndarstefnu.
• Rekstraraðili ber ábyrgð á að gögn sem hann skráir í kerfið séu lögmæt og rétt.
• Rekstraraðili ber sjálfur ábyrgð á að varðveita gögn sem honum er skylt að geyma. Um eyðingu og varðveislu hjá rPOS fer samkvæmt persónuverndarstefnunni.

Greiðslumiðlun og samþættingar

Kortagreiðslur fara í gegnum sjálfstæða greiðsluþjónustuaðila. Samningur um færsluhirðingu er milli rekstraraðila og greiðsluþjónustuaðilans. Rekstraraðili kann einnig að tengja bókhalds- eða verslunarkerfi frá öðrum þjónustuaðilum. rPOS ber ekki ábyrgð á uppgjöri, gjöldum, bilunum eða þjónustu þessara aðila.

Bókhald og lagaskyldur

Rekstraraðili ber ábyrgð á réttum stillingum og upplýsingum í kerfinu og á að uppfylla skyldur sínar um bókhald, skattskil, uppgjör og skráningu gagnvart yfirvöldum.

Leyfileg notkun

Óheimilt er að:

• nota þjónustuna í ólögmætum tilgangi eða til að skrá rangar upplýsingar,
• reyna að komast fram hjá aðgangsstýringum eða trufla rekstur kerfisins,
• afrita, framselja, selja áfram eða bakþýða hugbúnaðinn, nema lög heimili slíkt, eða
• hlaða inn efni sem brýtur á réttindum þriðja aðila.

Við getum takmarkað eða lokað aðgangi vegna brota á skilmálunum. Við sendum viðvörun og gefum hæfilegan frest til úrbóta nema brotið sé alvarlegt eða aðgerð þoli ekki bið.

Rekstraröryggi og ábyrgð

Við leggjum áherslu á góðan uppitíma og öryggi en getum ekki ábyrgst að þjónustan sé alltaf aðgengileg eða villulaus. Við getum rofið þjónustu tímabundið vegna viðhalds og uppfærslna og reynum að halda slíkri röskun í lágmarki.

Að því marki sem lög leyfa ber rPOS ekki ábyrgð á óbeinu tjóni, töpuðum hagnaði eða glötuðum gögnum. Bótaábyrgð rPOS takmarkast við áskriftargjöld sem rekstraraðili greiddi á tólf mánaða tímabili fyrir tjónsatburð. Takmörkunin gildir ekki ef tjón er rakið til ásetnings eða stórfellds gáleysis. rPOS ber ekki ábyrgð á töfum eða truflunum vegna atvika sem eru utan stjórnunar rPOS.

Hugverkaréttindi

Hugbúnaður, hönnun og vörumerki rPOS eru eign Retail ehf eða leyfisveitenda þess. Rekstraraðili fær takmarkað og óframseljanlegt afnotaleyfi meðan áskriftin er virk.

Breytingar á skilmálum

Við kunnum að uppfæra skilmálana. Ný útgáfa er birt á þessari síðu og dagsetningin efst uppfærð. Verulegar breytingar eru tilkynntar á skráð netfang rekstraraðila áður en þær taka gildi. Ef rekstraraðili samþykkir ekki breytingu getur hann sagt upp áskriftinni áður en hún tekur gildi. Áframhaldandi notkun eftir gildistöku telst samþykki.

Lög og varnarþing

Um skilmálana gilda íslensk lög. Rísi ágreiningur sem ekki tekst að leysa með samkomulagi skal hann rekinn fyrir Héraðsdómi Reykjavíkur.

Hafa samband

Spurningar um skilmálana má senda á:

Retail ehf · Reykjavík · support@rpos.is